ភ្នំពេញ៖ នាយកដ្ឋានប្រឆាំងបទល្មើស បច្ចេកវិទ្យាបានព្រមានពីការលួចយកព័ត៌មានគណនីធនាគាររបស់អ្នកប្រើប្រាស់បន្ទាប់ពីមានករណីផ្ញើសារពីការស្នើសុំព័ត៌មានធនាគារដោយមានភ្ជាប់នូវតំណ Link។

នាយកដ្ឋានបានស្នើដល់ពលរដ្ឋសូមកុំចុចលើតំណភ្ជាប់ឬLink ទាំង នោះ ហើយក៏មិនត្រូវឆ្លើយតប និងផ្ដល់ព័ត៌មានផ្ទាល់ខ្លួន និង ព័ត៌មានគណនីធនាគារជាដាច់ខាត ហើយបើមានការ មន្ទិលសង្ស័យសូមទាក់ទងទៅកាន់គ្រឹះស្ថានហិរញ្ញវត្ថុរបស់ខ្លួនដើម្បីបញ្ជាក់អោយបានច្បាស់លាស់មុននិងចុចទៅលើតំណភ្ជាប់ (Link)។

នាយកដ្ឋានប្រឆាំងបទល្មើសបច្ចេកវិទ្យា៖ «សូមក្រើនរំលឹកដល់សាធារណៈជនដែលបានប្រើប្រាស់បណ្តាញសង្គមនានា សូមកុំចុចតំណរភ្ជាប់ទាំងឡាយណាដែលគ្មានប្រភពច្បាស់លាស់ ចៀសវាងការកើតឡើងនូវហានិភ័យផ្សេងៗ»។

រយៈពេលប៉ុន្មានថ្ងៃមកនេះមានការ ផ្ញើសារមកកាន់ទូរស័ព្ទពលរដ្ឋជាច្រើ់នដោយសរសេរក្នងន័យស្រដៀងៗគ្នាឱ្យផ្ទៀងផ្ទាត់គណនីធនាគាររបស់អ្នកប្រើប្រាស់ បើមិនដូច្នោះទេលុយដែលមានក្នុងធនាគារទាំងនោះនឹងត្រូវបង្កក ហើយក៏មានភ្ជាប់នូវតំណ Link ឱ្យចុចទៅកាន់ផងដែរ។

ធនាគារអេស៊ីលីដា បានចេញប្រកាសមួយច្រានចោលកាលពីថ្ងៃទី៤ ខែមីនាថាការផ្ញើសារនេះជាការក្លែងបន្លំរបស់ជនអាណាមិក និងសុំកុំឱ្យអតិថិជនចូលទៅកាន់តំណភ្ជាប់ Link នោះជាដាច់ខាតផងដែរដោយបញ្ជាក់ថាធនាគារនឹងមិនទាក់ទងអតិថិជនសួរអំពីលេខគណនី ឬព័ត៌មានផ្ទាល់ខ្លួនរបស់អតិថិជន តាមរយៈសារ SMS អ៊ីម៉ែល ឬទូរសព្ទនោះទេ៕